12:07, 23 августа 2024, Бишкек - 24.kg
Адахан Мадумаровдун Жогорку Кеңештин депутаттык мандаты «Бүтүн Кыргызстан» партиясынын мүчөсү Аккулу Бердиевге берилди. Бул тууралуу Шайлоо жана референдум өткөрүү боюнча борбордук комиссиясынын жыйынында белгилүү болду.
Белгилей кетсек, 26-апрелде Борбордук шайлоо комиссиясынын мүчөлөрү Адахан Мадумаровдун ыйгарым укуктарын мөөнөтүнөн мурда токтотушкан. Мындай чечим борбор калаанын Биринчи Май райондук сотунун өкүмүнүн негизинде кабыл алынды. 26-мартта райондук сот Мадумаровду 2009-жылы кыргыз-тажик чек арасы боюнча протоколго кол койгону үчүн мамлекеттик чыккынчылык жана алдамчылык боюнча күнөөлүү деп тапты. Бишкек шаардык сотунун Кылмыш-жаза коллегиясы Адахан Мадумаровго карата райондук соттун өкүмүн өзгөртүүсүз калтырды.
Аккулу Бердиевге белгиленген үлгүдөгү күбөлүк жана төш белги тапшырылды.
Эске сала кетсек, буга чейин парламент депутат Адахан Мадумаровду жоопкерчиликке тартууга макулдук берген. Кеп 2009-жылы Хожентте кол коюлган протоколго тиешелүү болууда. Мадумаров Коопсуздук кеңешинин катчысы болуп туруп, тажик тарап менен коопсуздук кеңештеринин катчыларынын жетекчилиги астында эки өлкөнүн мамлекеттик органдарынын жетекчилеринин жумушчу жолугушуусунун протоколуна кол койду. Документке ылайык, кыргыз тарап Тажикстандан аянты 5 гектар, узундугу 275 метр болгон жер тилкесин 49 жылга ижарага алган. Протокол Худжанддагы сүйлөшүүлөрдөн кийин кабыл алынды. Чиновниктер мамлекеттик чек араны демаркациялоо аяктаганга чейин анын жээгинде чарба жүргүзүүгө тыюу салган өкмөттөр аралык келишимге кол коюунун мамлекеттик ички жол-жоболорун шайкеш келтиришти.