«Манас» аэропортуна жардыруучу зат бар экени айтылган маалымат тастыкталган жок. Бул тууралуу 24.kg басылмасына мекеменин басма сөз кызматы билдирди.
Маалыматка ылайык, жардыруучу зат тууралуу кабар бүгүн, 22-августта аэропорттун электрондук почтасына келген.
Жеринде милиция кызматкерлери иш алып барып, эч кандай күмөндүү зат табылган эмес.
Текшерүү аяктагандан кийин эвакуацияланган жүргүнчүлөр жана кызматкерлер аэропорттун имаратына кайтып келишти жана аэропорттун иши толугу менен калыбына келтирилди.
Белгилей кетсек, ушул сыяктуу окуялар үстүбүздөгү жылдын март, май, июнь айларында болуп, жардыруучу зат коюлган делген маалыматтар түшкөн. Бирок бул жолкудай эле маалымат жалган болуп чыкты.
