70 жылдан бери биринчи жолу Кыргызстандын Улуттук илимдер академиясын капиталдык оңдоо иштери башталды. Бул тууралуу УИАнын президенти Канат Абдрахматов Фейсбук баракчасына жазды.
«Улуттук илимдер академиясынын башкы имаратында капиталдык оңдоо иштери жүрүп жатат. Бул 70 жылдан бери биринчи жолу жасалууда. Өткөн жылдарда биз бир нече жолу «косметикалык» оңдоп-түзөтүүлөрдү жасаганбыз. Бирок ал баары бир болбойт экен. Илим кайрадан жаралып, бутубузга турабыз деп ишенем», — деп жазган ал.
Илимдер академиясынын жетекчисинин айтымында, оңдоо иштери бир гана башкы имаратта эмес, имараттын алдындагы эски асфальтты алып, жаңысын төшөп жатышат.
«Биз кара топурак алып келдик — көбүнчө унаалар токтогон жерде көк чөп болот. Жан кубанат», — деп кабарлады ал. Канат Абдрахматов ошондой эле 2024-жылы алты илимий долбоор каржыланганын, анын бири ДНК лабораториясын түзүү экенин билдирди.
