13:51, 10 июня 2024, Бишкек - 24.kg
Кыргызстанда биринчи жолу боор алмаштыруу операциясын жасоо бүгүн, 10-июнда башталат. Саламаттык сактоо министрлигинин маалыматы боюнча, 2 бейтаптын боору алмаштырылат
Боорду трансплантациялоону жергиликтүү дарыгерлер жасашат. Алар Түркияда боор трансплантациялоо боюнча окуудан өтүп келишкен. Операция учурунда түрк адистери көмөктөшөт. Буга чейин анестезиолог-реаниматолог, эки хирург жана медайымдан турган түрк дарыгерлер тобунун келери айтылган эле.
«Боорду алмаштыруу боюнча бардык операциялар президенттин фондунан каржыланат. Боорду алмаштыруу боюнча бир операция 25-30 миң долларды түзөт. Бардык муктаждар үчүн боорду алмаштыруу боюнча процедураларды жеткиликтүү кылуу үчүн Кыргызстандын президенти Садыр Жапаров мамлекет башчысынын жеке фондунан каржылоо чечимин кабыл алган», — деди саламаттык сактоо министри Алымкадыр Бейшеналиев.
Эске салсак, өлкөдө былтыр бөйрөк алмаштыруу операциясы ийгиликтүү аяктаган. Андан бери он чакты бейтапка операция жасалды. Кезекте 110 бейтап турат.