10:31, 19 февраля 2024, Бишкек - 24.kg
Чыгыш жана Батыш автобекеттерин шаардын четине көчүрүү үчүн кеминде 25 миллион доллар талап кылынат. Бул тууралуу Бишкек мэриясынын коллегиясында министрлер кабинетинин төрагасы Акылбек Жапаров билдирди.
Анын айтымында, каражат бар жана алар бөлүнө баштады. Долбоор 2024-жылы ишке ашат деп болжолдонууда.
2023-жылы сентябрда шаардык муниципалитеттин транспорт департаментинин башчысынын орун басары Улан Уезбаев мэрия Батыш жана Чыгыш автобекеттери көчүрүлө турган жерлерди аныктаганын билдирген.
Анын айтымында, долбоор боюнча шаар чети менен жүргөн каттамдар шаардын ичине кирбеши керек. Алар автобекеттерге токтоп, ал жактан жарандар Бишкекке коомдук транспорт менен жете алышат.
Батыш автобекетин Пригородное айылы жакка, Чыгыш автобекетин Silk Way логистикалык комплексинин аймагына көчүрүү сунушталган.