Россиядагы мигранттар санариптик ММК полисин кантип ала алышат

10:28, 15 февраля 2024, Бишкек - 24.kg

Эмгек министрлиги Москвадагы эмгек мигранттарына санариптик милдеттүү медициналык камсыздандыруу (ММК) полисин кантип акысыз алууга болору тууралуу маалымат берди.

Мекеме 15-февралдан тарта Москва шаарында иштеген кыргызстандыктар милдеттүү медициналык камсыздандыруунун санариптик полисин ала аларын маалымдады. Ал үчүн министрликтин Москва шаарындагы өкүлчүлүгүнө Малая Полянка көчөсү, үй № 7 дареги боюнча баруу керек. Каттоо ар бейшемби күнү саат 11.00дөн 17.00гө чейин жүргүзүлөт.

Алуу акысыз. Төмөнкү документтердин түп нускаларын гана көрсөтүү керек (18 жаштан баштап чет өлкөлүк жарандар үчүн):

• чет өлкөлүк жарандын паспорту;
• эмгек келишими (жарандык укуктук келишим эмес, контракт эмес жана башкалар);
• жеке эсептин камсыздандыруу номери (ЖЭКН- СНИЛЗ) (сөзсүз);
• чет өлкөлүк жарандын келүүсү жөнүндө кабарлоо бланкынын айрыма бөлүгү.

Милдеттүү медициналык камсыздандыруунун санариптик полиси:

• Россиянын бардык аймагында акысыз медициналык жардам алууга;
• диспансеризациядан жана профилактикалык текшерүүдөн өтүү;
• адистештирилген медициналык жардам алуу үчүн дарылоо мекемелерин тандоо мүмкүнчүлүгүн берет.