17:59, 21 декабря 2023, Бишкек - 24.kg , Замира НИЯЗБЕКОВА
Чүй облусунда Тажикстандан аткезчилик жол менен ташылып келген спирттен жасалма арактарды даярдаган кылмыштуу топ кармалды. Бул тууралуу ИИМдин басма сөз кызматы билдирди.
Аталган факты боюнча кылмыш иши козголгон. Анын алкагында шектүүлөр жасалма спирт ичимдиктерин жасоо менен алектенген сактоочу жайды ижарага алышкандыгы аныкталды.
«Тинтүү жүргүзүү учурунда аткезчилик жол менен даярдалган 1 миң 783 даана беш литрлик бөтөлкөдөгү спирт (8 тонна 895 литр), арак жасоочу эки станок, ичинде жасалма арак куюлган 100 граммдык стакандар салынган 50 куту, жана 2 миң акциздик маркалар жана дары-дармектер табылган. Азыркы учурда тиешелүү экспертизалар дайындалды», — деп айтылат маалыматта.
Кылмышка шектүү катары Чүй облусунун беш тургуну жана аталган кылмыштуу топтун уюштуруучусу кармалды.
Кармалган жарандар тергөө абагына киргизилди. Учурда кылмыштуу топтун калган катышуучуларын кармоо боюнча иш-чаралар жүрүп жатат.