13:09, 11 октября 2023, Бишкек - 24.kg
Жогорку Кеңештин депутаты Дастан Бекешев балдарын карабаган чиновниктерди кызматтан алууну сунуштоодо. Бул тууралуу ал парламенттин жыйынында билдирди.
Эл өкүлдөрү биринчи окууда Тазабек Икрамовдун мыйзам долбоорун карап жатышат. Анда ата-энесин карабай, карылар үйүнө таштап койгон учурда балдарына 100 миң сомго чейин айып пул салуу же бир жылдан эки жылга чейин эркинен ажыратуу каралган. Демилгечи ошондой эле ата-энесин карабагандарды мамлекеттик кызматка албоону сунуштоодо.
Мындан тышкары, Дастан Бекешев балдарын кароосуз калтырган мамлекеттик кызматкерлерге карата жазаны күчөтүүнү сунуштады.
«Балдарын гана эмес, ата-энесин да карабагандарды мамлекеттик кызматтан бошотуу керек. Балдарды таштабаш керек», — деди депутат.