10:23, 07 сентября 2023, Бишкек - 24.kg
Боршайкомдун жумушчу тобу Лениндик бир мандаттуу шайлоо округу боюнча депутаттыкка талапкер Кубанычбек Самаковдун соттуулугу тууралуу маселени карады.
Буга чейин социалдык тармактарда Самаковдун мурда соттолгондугу тууралуу маалыматтар чыккан.
Соттуулугу жоюлбаган жаран Жогорку Кеңешке депутат боло албагандыктан, БШК каттоо алдында текшерүү жүргүзгөн. Мандатка талапкерлердин соттуулугун текшерүүнү ИИМ жүргүзөт.
БШК «Түндүк» мекемелер аралык электрондук өз ара аракеттенүү системасы аркылуу мекемелер менен шайлоого катышууга ниеттенген жарандардын соттуулугу жөнүндө маалымат алмашып турат.
Ички иштер министрлигинен билдиришкендей, текшерүүдөн кийин Кубанычбек Самаковдун соттуулугу жоюлгандыгы аныкталган.
БШК Башкы прокуратурадан да маалымат сурап, ал бул маселе боюнча ички иштер министрлиги жооптуу деп билдирген.
Кубанычбек Самаков атасы Карганбек Самаков менен бирге 2017-жылы жерлерди мыйзамсыз трансформациялоо боюнча күнөөлүү деп табылган. Ал мүлкүн конфискациялоо менен сегиз жылга эркинен ажыратылган, бирок мунапыс менен мөөнөтү кыскартылган.
Ленин бир мандаттуу округу боюнча кайра шайлоо 10-сентябрда өтөт.
Буга чейин БШК Ленин району боюнча 28-майда өткөн мөөнөтүнөн мурда шайлоонун жыйынтыгын жараксыз деп таап, Дамира Ниязалиевага берилген добуштар жокко чыгарылган. Ал шайлоодо добуштардын 35,86 пайызын алган.