09:47, 21 августа 2023, Бишкек - 24.kg
Президент Садыр Жапаров 20-августта Будапешт шаарына болгон иш сапарынын алкагында Венгриянын премьер-министри Виктор Орбан менен жолугушту.
Тараптар кыргыз-венгер стратегиялык өнөктөштүгүнүн актуалдуу маселелери, соода-экономикалык жана маданий-гуманитардык чөйрөлөрдө кызматташууну тереңдетүү талкууланды.
Виктор Орбан Садыр Жапаровдун февралда Венгрияга болгон иш сапары ийгиликтүү болуп, эки тараптуу мамилелердин өнүгүшүнө чоң түрткү болгонун эске салды. Февралдагы жолугушуунун макулдашууларына ылайык, бүгүнкү күндө бир катар тармактарда алгылыктуу жетишкендиктер белгиленүүдө.
Ошондой эле, ал Садыр Жапаровго эки тараптуу кызматташууну өнүктүрүү аракети үчүн ыраазычылык билдирди, эки өлкөнүн географиялык алыстыгына карабастан Кыргызстан менен Венгриянын ортосундагы мамилелерди өнүктүрүүгө мүмкүн болууда.
Кыргыз-венгер кызматташтыгын тереңдетүү тууралуу айтып жатып, Виктор Орбан Кыргызстан менен Венгриянын элдерин жакындаштыруу үчүн эки мамлекеттин борборлорунун ортосунда түз авиакаттам ачуу зарылдыгын белгиледи. Ал билим берүү тармагындагы кызматташууга да көңүл буруп, Венгрияда квота боюнча алдыңкы университеттерде билим алып жаткан кыргызстандык студенттер тууралуу дагы айтты.
Садыр Жапаров экономикалык байланыштарга токтолуп, Кыргызстан үчүн Венгрия менен соода-экономикалык жана инвестициялык кызматташууну өнүктүрүү приоритеттүү багыт болуп саналарын белгиледи. 2023-жылдын беш айында өткөн жылдын ушул мезгилине салыштырмалуу эки өлкө ортосундагы соода жүгүртүүнүн оң динамикасы белгиленди. Бул динамиканы сактоо жана өз ара сооданы мындан ары жогорулатуу боюнча аракеттерди көрүү маанилүү.
Тараптар эки өлкө ортосундагы стратегиялык өнөктөштүк мындан ары да бардык чөйрөдө кеңейип жана бекемделерине ишеним артышты.