Россия менен Украинанын сүйлөшүүсүнүн экинчи раунду аяктады
09:49, 04 марта 2022, Бишкек - 24.kg
Беларустун Брест облусунда Россия менен Украинанын сүйлөшүүлөрүнүн экинчи раунду аяктады. Бул тууралуу «Sputnik жакынкы чет өлкө» Telegram-каналы жазды.
Анда төмөнкү учурларга токтолушкан:
- Москва үч бөлүктөн турган сунуштарды даярдаган. Анда аскердик-техникалык, гуманитардык-эл аралык жана саясий аспектилер камтылган. РФ тараптын делегация башчысы Владимир Мединскийдин айтымында, Россия менен Украина сүйлөшүүлөрдүн айрым пунктулары боюнча бири-бирин түшүнүштү;
- Тараптар бир катар гуманитардык маселелерди, анын ичинде жардам жеткирүү коридорлорун уюштуруу үчүн атышууну убактылуу токтотуу мүмкүнчүлүгүн макулдашты;
- Владимир Зеленскийдин кеңсесинин жетекчисинин кеңешчиси Юрий Подоляк жарандарды эвакуациялоо үчүн атайын байланыш каналдарын түзүү пландалып жатканын айтты;
- Зеленскийдин кеңсесинин башчысынын кеңешчиси Украина күткөн жыйынтыкка жеткен жок деп билдирди;
- Мамдуманын эл аралык комитетинин жетекчиси Леонид Слуцкий Россия менен Украинанын ортосундагы келишимдер жакынкы аралыкта жогорку деңгээлде бекитиле турганын айтты. Макулдашуулар парламенттин күч-аракетин, анын ичинде ратификациялоону талап кылышы мүмкүн;
- Сүйлөшүүлөрдүн үчүнчү раунду жакынкы күндөрү өтөт.