09:58, 29 июля 2020, Бишкек - 24.kg
Адабиятчы, кыргыз эл жазуучусу Кадыркул Даутов катуу оорудан улам 79 жашында дүйнөдөн кайтты. Бул тууралуу президенттин аппаратынан барлашты.
Кадыркул Даутов 1940-жылы 10-сентябрда Ош облусунун Алай районундагы Үч-Төбө айылында туулган. 1961-жылы Токмоктогу маданий-агартуу мектебин, 1969-жылы Кыргыз улуттук университетинин филология факультетин бүтүргөн.
1970-1973-жылдары Максим Горький атындагы Бүткүл союздук адабият институтунда окуган, филология илимдеринин кандидаты илимий даражасын коргогон.
Ушул эле жылы Кыргыз совет энциклопедиясынын адабият жана искусство редакциясынын башчысы болуп дайындалган, 1974-1975-жылдары Кыргыз ССР Илимдер академиясынын Тил жана адабият институтунун кызматкери, 1976-1981-жылдары советтик тил жана адабият секторунун башчысы болуп иштеген.
2007-жылдан бери Жусуп Баласагын атындагы Кыргыз улуттук университетинин профессору болгон.
Кадыркул Даутов 1960-жылдардын экинчи жарымынан тартып адабий сын жаатында иштей баштаган. 1977-жылы «Ырдын өмүрү» аттуу адабий-сын макалалар жыйнагын жарыялаган. Жыйнак кыргыз жана орус тилдеринде жазылган.
Ал адабий сындын келип чыгышын жакшы айырмалап, ушул тармакта бийиктиктерге жетип «профессор» атыккан.
1978-жылы СССР Жазуучулар союзуна кабыл алынган. Жогорку жетишкендиктери жана өлкөнүн маданиятынын жана адабиятынын өнүгүшүнө кошкон салымы үчүн 2000-жылы «кыргыз маданиятына эмгек сиңирген ишмер» наамын, 2016-жылы — «Кыргыз Эл жазуучусу» наамын алган.
24.kg маалымат агенттиги Кадыркул Даутовдун үй-бүлөсүнө жана жакындарына көңүл айтат.