04:19
USD 79.35
EUR 92.87
RUB 1.04

Лукашенко «Би-Би-Си» жана «Азаттык» журналисттерин өлкөдөн чыгарууну талап кылды

Беларустун президенти Александр Лукашенко элди «массалык башаламандыктарга чакырган» чет элдик журналисттерди өлкөдөн чыгарууну талап кылды.

Бул тууралуу мамлекеттик БелТА маалымат агенттиги кабарлады.

23-июлда Минскидеги жыйында сүйлөп жатып президент өкмөт мүчөлөрүн өз ишин жакшы аткарып, элге болуп жаткан окуяларды жакшыраак түшүндүрүүгө чакырды.

Лукашенко «Би-Би-Си», «Эркин Европа/Азаттык» радиолорун жана бир катар интернет сайттарды сынга алып, журналисттерди «массалык башаламандыкка үндөп жатышат» деп айыптады.

«Шайлоо кампаниясынын аякташын күтпөй, мыйзамдарды урматтабаса, майданга чакырышса, аларды өлкөдөн чыгарып жибергиле», — деди мамлекет башчы.

9-августка белгиленген президенттик шайлоо алдында Беларуста Лукашенконун негизги оппозициялык атаандаштары жарыштан четтетилип, кээ бирлери камакка алынды. Нааразылык акцияларды чагылдырган журналисттер да кармалууда.

14-15-июль күндөрү кармалгандардын арасында «Эркин Европа/Азаттык» радиосунун беларус кызматынын кабарчылары да бар. Бул күнү Антон Трофимович аттуу журналист сабалган.

Радионун президентинин милдетин аткаруучу Дейзи Синделар «түз эфирди жүргүзүп жаткан кесиптештербиздин полициянын чабуулуна туш болгону — бийлик элди ишеничтүү маалыматтардан ажыратууну көздөгөнүнөн күмөн жаратпайт» деп билдирди.

Эң көп окулган жаңылыктар