Таласта «Үчүнчү канал» телеканалына өрт коюшту

09:27, 08 июня 2020, Бишкек - 24.kg

Талас облусунда «Үчүнчү канал» телеканалынан өрт чыгып, 300 миңге жакын чыгымга учурады. Бул тууралуу телеканалдын коммерциялык директору Перизат Мамырова 24.kg агенттигине маалымдады.

Анын айтымында, өрт 6-июнда болжол менен саат 4:00 чамасында чыккан. Жумушка келген кызматкерлер келгенде гана байкашкан.

«Бул кимдир бирөөлөр тарабынан өрттөлгөн. Биздин кеңсенин терезесин кирпич менен сындырышып, бутылканын ичине жардыргыч салып ыргытышкан. Чыгымдарды дагы эсептеп жатабыз, бирок алдын ала эсептөөлөр боюнча 300 миң сомду түздү. Бул суммага өрттөнүп кеткен компьютерлер жана башка техникалар кирет. Милиция кызматкерлери баардык далил болгон буюмдарды алып кетишти», — дейт Перизат Мамырова.

Талас облустук ИИБ Кылмыш жана жоруктар реестрине «Бирөөнүн мүлкүн жок кылуу жана зыян келтирүү » беренеси боюнча катталганын билдиришти.