11:33, 03 февраля 2020, Бишкек - 24.kg
Владимир Зеленский Тегеран шаарындагы учак кырсыгынан каза болгон украиналыктардын үй-бүлөсүнө компенсация төлөө сунушун четке какты. Бул тууралуу «ТСН. Неделя» телеберүүсүнө берген маегинде билдирди.
Украина президентинин айтымында, Иран мамлекети ар бир үй-бүлөгө 80 миң доллардан төлөп бермей болгон.
«Менин оюмча, бул аз. Каза болгон күйөөсү үй-бүлөсүн жалгыз багып келгенин жана баласы университетке тапшырышы керек экенин айткан аялдарга 80 миң доллар аз деп ойлойм», — деди Владимир Зеленский.
Украина эл аралык сотко доо арыз берүүгө камынууда.
Эскерте кетсек, 8-январь күнү эртең менен Тегерандын аэропортунан Киевге багыт алып абага көтөрүлгөн Украинанын Boeing 737-800 самолету бир аз убакыттан кийин эле жерге кулаган. Ичиндеги 167 жүргүнчү менен экипаждын 9 мүчөсүнүн эч кимиси аман калган эмес. Кийинчерээк учак Иран тарабынан атылганы белгилүү болгон.