Түрк кеңеши 2009-жылы түзүлгөн. Ага Азербайжан, Казакстан, Кыргызстан жана Түркия мүчө. Бул топко кошулуу үчүн Өзбекстан сентябрда арыз берген. Былтыр Кыргызстанда өткөн Түрк кеңешинин жыйынында Венгрия байкоочу өлкө катары катышкан.
Өзбекстан президенти Шавкат Мирзиёев Түрк тилдүү мамлекеттердин кызматташтык кеңешинин жетинчи саммитинде сөз сүйлөп, бирдиктүү технопарктарды, инновациялык стартап-компанияларды, бирдиктүү инвестициялык фондду түзүүнү жана түрк тилдүү өлкөлөрдүн соода үйлөрүн ачууну сунуштады.
Шавкат Мирзиёев Европа, Кытай жана Түштүк Азия рынокторуна эшик ача турган ири транспорттук-коммуникациялык долборлорду ишке киргизүүнүн маанилүүлүгүн белгилеп, Баку-Тбилиси-Карс жаңы темир жолунун потенциалын жигердүү пайдалануу зарылдыгын айтты.