Чек ара жаңжалы. Абал туруктуу, өткөрүү пункттары штаттык негизде иштеп жатат
11:42, 18 сентября 2019, Бишкек - 24.kg
Кыргыз-тажик чек арасындагы абал туруктуу. Бул тууралуу Чек ара кызматынан билдиришти.
Маалыматка караганда, Тажикстан менен чектеш өткөрүү пункттары штаттык негизде иштеп жатат. Болгону "Кулунду-унаа жолу" көзөмөл өткөрүү пунктун тажик тарап бир тараптуу жапкан.
Эске салсак, 14-сентябрда Лейлек районундагы Максат айылында такталбаган чек ара аянтында тажик тарап курулуш иштерин башташкан. Кечээ Лейлек районунда кыргыз-тажик чек арасындагы окуяда тажик тарап биринчилерден болуп ок чыгарган. Анда Кыргызстандын чек ара кызматынын бир аскери каза таап, бир нече жаран жаракат алган. Бүгүн премьер-министр Мухаммедкалый Абылгазиев Куралдуу күчтөрдүн аскердик-транспорттук учагы менен Баткен облусуна келгени кабарланган.
