10:10, 22 апреля 2019, Бишкек - 24.kg , Элеонора КЫДЫРОВА
21-апрелде Гапар Айтиев атындагы Улуттук көркөм сүрөт музейинде, «Жибек жолу» интерактивдүү көргөзмөсүнүн алкагында Индиянын Кыргызстандагы өкүлчүлүгү өздөрүнүн маданиятын таанытты. Келген меймандар индиялыктардын ыр-бийлерине күбө болушту.
Иш-чаранын жүрүшүндө индия элине гана эмес, дүйнө жүзүнө атагы чыккан чайлардын көргөзмө жарманкеси уюштурулду.
Индиянын сулуу кыздары келген жаштардын колдоруна кына менен мехенди, убактылуу татуировка тартып беришти.
Индияда белгилүү спорттун бир түрү болгон таяк тартышуу оюну, шахмат көрсөтүлдү.
Индиялыктар кына боегу менен асфальт бетине сүрөт тартышты.
Эске салсак, иш-чара «Роза Отунбаеванын демилгеси» эл аралык коомдук фонду жана «Кийиз дүйнө» коомдук фондунун колдоосу менен уюштурулду. 28-апрелге чейин Жибек жолу кесип өткөн өлкөлөрдүн Кыргызстандагы 16 элчилиги катышып, ар бири бөлүнгөн бир күндө өз өлкөсүн таанытат.
Көргөзмөгө Кыргызстан, Казакстан, Өзбекстан, Тажикстан, Азербайжан, Түркмөнстан, Кытай, Индия, Иран, Түркия, Монголия, Жапония, Түштүк Корея, Пакистан, Ооганстан жана Орусия өлкөлөрүнүн элчиликтери катышат.