Эл каттоо. Бир жылдан ашык четте жүргөн мигранттар калктын катарына кошулбайт

14:46, 20 февраля 2019, Бишкек - 24.kg

2020-жылы Кыргызстанда ири иш-чара — калкты жана турак жайды каттоо жүрөт.

Алгач 2019-жылдын 25-мартында Токмок шаарынын тургундары каттоого алынат. Чүй облусундагы бул шаар пилоттук район катары тандалып алынды. Анын жыйынтыгынын негизинде жалпы республикалык акциянын даярдыгында акыркы жыйынтыктар чыгарылат.

Белгилүү болгондой элди каттоо үчүн 25 миң киши атайын окуудан өтөт. Аларга айлык акы төлөнүп берилет.

Президенттин тапшырмасы менен каттоо электрондук түрдө жүрөт. Ал үчүн 54 миллион сомго планшеттер сатылып алынат. Улуттук статком бул ишти «Инфокомдун» жардамы менен ишке ашырмакчы.

Өкмөт үчүн аты жок көчөлөр, мыйзамсыз үйлөр баш оорутуну жаратууда.

Кыргызстанда 29 миң көчө болсо, анын 1 миң 591үнө ысым бериле элек. Алардын көпчүлүгү Бишкек шаарында, андан кийин Ош облусу, Баткен жана Талас турат.

Андан тышкары, мыйзам курулуштар дагы каттоодо тоскоолдуктарды жаратат. Бирок, жыйынтыгында өкмөт мыйзамсыз курулуштардын так санын билмекчи.

«Бишкек шаарында 6,5 миңдей мыйзамсыз салынган үй бар. Биз аларды каттоону кантип уюштуруу жагын азыр карап жатабыз. Ал үйлөргө техникалык паспорт берүү сунушу парламентте каралып жатат. Үйдө жашаган жарандар паспорт алып, жергиликтүү мектеп жана ооруканага баруу мүмкүнчүлүгүнө ээ болушу керек», — дейт Бишкек мэриясынын өкүлү.

Кыргызстандыктар 19 суроого жооп беришет. Айтмакчы каттоо учурунда жооптон баш тартууга болбойт.

«Суроолорго жеке сыр түрүндөгү маалыматтар суралбайт», — дейт Улуттук стастикалык комитет.

Фото

Суроолор үй-бүлө, үй-бүлө мүчөлөрү, жашаган жери, киреше булагы тууралуу берилет.

Андан тышкары, миграция боюнча, чет өлкөдөн акчалай которуулар боюнча дагы суроолор киргизилди. Айтмакчы, четте бир, же андан көп жыл жашагандар Кыргызстандын калкынын санына кошулбайт.

Бул эл аралык талап. 2009-жылы да ушундай талап коюлган. Бирок, биз анда калктын санына кошконбуз. 100 миңдей киши ошондо четте жүргөн. Бул эл каттоодо алар кошулбайт. Анткени такай өлкөдө жашагандар гана калктын санын түзө алат.
Улуттук статистикалык комитет

Айтмакчы, мигранттар боюнча суроолдор КМШ жана ЕАЭБтин сунушу менен кирди.

«Чет өлкөдө каттоо жүрбөйт. Биз болгону дипломатиялык миссиялардын кызматкерлерин жана алардын үй-бүлөсүн гана каттайбыз», — деди Улуттук стаском.

Эл каттоодо чет элдик жарандар дагы катталат. Алар Кыргызстанга сапарынын максатын айтып беришет.

Белгилей кетсек, эл каттоо ар бир 10 жылда жүргүзүлөт. 2009-жылы Кыргызстандын калкынын саны 6,5 миллион болгон.