Борбор калаанын Жылуулук электр борбору 2026-2027-жылдардагы жылытуу сезонуна даярдык көрүүнүн алкагында оңдоо иштери уланууда. Бул тууралуу мэриядан билдиришти.
Маалыматка ылайык, учурда адистер казандарды жана турбиналык жабдууларды пландык оңдоп-түзөөдөн өткөрүп, станциянын негизги өндүрүштүк системаларын текшерип, калыбына келтирип жатышат.
Жумуштар жылытуу сезонуна даярдануунун бекитилген планына ылайык жүргүзүлүүдө. Шаардык бийлик билдиргендей, бул иштер алдыдагы күз-кыш мезгилинде ЖЭБдин ишенимдүү жана туруктуу иштешин камсыз кылууга багытталган.
Эскерте кетсек, бир жума мурда муниципалитет ишкана жылытуу сезонуна болжол менен 80 пайызга даяр экенин кабарлаган.
Маалымат үчүн
Бишкекте жылытуу сезону абанын суткалык орточо температурасы беш күн катары менен +8 градустан төмөн болгондо башталат. Жылуулукту берүүнүн так күнүн аба ырайын эске алуу менен мэрия аныктайт. 2025-жылы борбор калаада жылытуу сезону 3-ноябрда башталган.


