Минкаб: «1 -октябрдан тарта орточо пенсия дээрлик 13 миң сомду түзөт»
Министрлер кабинетинин төрагасы Адылбек Касымалиев бүгүн, 21-сентябрда аппараттык кеңешме өткөрдү. Анда аткаминерлер өлкөнүн социалдык-экономикалык өнүгүү маселелерин талкуулашканын Министрлер кабинетинин басма сөз кызматы билдирди.
Кеңешмеде өзгөчө көңүл 1-октябрдан тарта пенсияларды жогорулатууга бурулду. Индексациядан кийин пенсиянын орточо өлчөмү 12 миң 898 сомду, ал эми орточо жогорулатуу 1 миң 753 сомду түзөт. Адылбек Касымалиев пенсионерлер төлөмдөрдү өз убагында алуусу үчүн бардык зарыл иштерди мөөнөтүндө аяктоону тапшырды.
Күн тартибиндеги дагы бир маселе аймактардагы Беккари чуңкурларынын абалы болду. Жооптуу органдарга аларды толук инвентаризациялоо, техникалык жана санитардык абалын текшерүү, зарылчылык болсо объекттерди тартипке келтирүү тапшырылды.
Маалымат катары:
Беккари чуңкурлары — бул тарптарды жана биологиялык калдыктарды коопсуз көмүү үчүн атайын жайлар. Алар инфекциялардын жайылышын алдын алуу үчүн колдонулат.
Минкаб башчысы биологиялык калдыктарды утилизациялоонун заманбап ыкмаларын, анын ичинде инсинерацияны — атайын түзүлүштөрдө жогорку температуралык термикалык утилизациялоо мүмкүнчүлүгүн изилдөөнү тапшырды.
Кеңешмеде үстүбүздөгү жылы социалдык объекттерди жана өнөр жай ишканаларын куруу жана пайдаланууга берүү маселелери да каралды. Иш-чаранын жыйынтыгы боюнча мамлекеттик жана жергиликтүү органдардын жетекчилерине тиешелүү тапшырмалар берилди.


