USD87.45EUR95.88RUB1.07
24.kg

Акыйкатчы институту Баткенде балдардын окуусун улантууга көмөк көрсөттү

15:50, 18 сентября 2026, Бишкек - 24.kg

Акыйкатчы институту Кызыл-Кыя шаарында ата-энеси менен чет өлкөдөн кайтып келген үч баланын билим алууга болгон укугун коргоп, алардын мектепте окуусун улантууга жардам берди.

Аталган институттан билдиришкендей, акыйкатчыга Кызыл-Кыянын тургуну жакын туугандарынын үч баласын шаардагы № 2 жалпы орто билим берүү мектебине кабыл албай жатканын айтып арызданган.

Жарандын айтымында, туугандары чет өлкөдөн эмгек миграциядан кайтып келишкен. Алардын балдары орусча билим алып калышкандыктан Кызыл-Кыядагы жалгыз орус тилдүү мектепке берүүнү каалашкан.

Арыздануучу аталган мектеп директорунун орой мамилесине жана шаардык билим берүү бөлүмүнүн жетекчисинин көңүл коштугуна дагы даттанган.

Акыйкатчы мнституту Кызыл-Кыя шаарынын прокуратурасына, шаардык билим берүү бөлүмүнө жана мэрияга арызда айтылган жагдайды аныктап, тиешелүү иш-аракеттерди көрүү тууралуу суроо-талаптарды жөнөткөн.

Билим берүү бөлүмүнүн маалыматында № 2 мектепте окуучулардын саны ашыкча болуп, бир класста 60 баладан окушкандыктан балдар кабыл алынган эместиги айтылган.

Кызыл-Кыя шаарынын мэриясынын берген маалыматына ылайык, балдардын билим алуусун үзгүлтүккө учуратпоо максатында Пушкин атындагы № 4 жалпы билим берүү мектебине жайгаштырылды.

Белгилей кетсек, жыл башынан бери Акыйкатчы институтуна билим алуу укугуна байланыштуу 44 кайрылуу түшкөн.

БАЙЛАНЫШТАР

СОЦИАЛДЫК ТАРМАКТАР

TelegramYouTubeWhatsAppFacebookInstagram

© АА «24.kg» - Кыргызстандын жаңылыктары. Бардык укуктар корголгон. Бул веб-сайтта жайгаштырылган бардык маалымат жеке пайдалануу үчүн гана арналган жана АА «24.kg» жазуу түрүндөгү уруксатысыз таратылышы мүмкүн эмес. Редакция кайра басылган материалдардын жана айрым адамдардын пикирлеринин мазмунуна жоопкерчилик тартпайт. +18