USD87.45EUR95.88RUB1.07
24.kg

«Бедел» өткөрмө бекетине 56 метрлик көпүрө курулат

16:53, 14 сентября 2026, Бишкек - 24.kg
Бактыгүл Калдарбаева

Кыргызстан менен Кытайдын чек арасындагы Үзөңгү-Кууш дарыясы аркылуу «Бедель» өткөрмө бекетине туруктуу унаа көпүрөсүн куруу пландалууда. Долбоорду Жогорку Кеңештин тиешелүү комитети жактырды.

Транспорт жана коммуникациялар министринин орун басары Бактылуу Аскар уулу Момбековдун айтымында, көпүрө эки өлкөнүн ортосундагы транспорттук байланышты өнүктүрүп, өткөрмө бекеттин инфраструктурасын жакшыртуу үчүн керек.

«Бедель» өткөрмө бекети 2024-жылдын сентябрында ачылган. Учурда чек ара аркылуу каттам убактылуу темир көпүрө аркылуу камсыздалууда.

Долбоор боюнча жаңы көпүрөнүн узундугу 56 метр, туурасы 12 метр болот. Анын 28 метри Кыргызстандын, калган 28 метри Кытайдын аймагында жайгашат.



Көпүрө өзүнчө объект болбостон, жаңы транспорттук багыттын бир бөлүгү болот. Кыргыз тараптан ал узундугу 161 чакырым болгон Барскоон - Бедель жолуна туташат.

Көпүрө жана ага алып баруучу жолдорду ар бир өлкө өз аймагында каржылайт. Алдын ала эсеп боюнча, көпүрөнүн курулушу 940 миң доллардай турат. Бирок долбоордук-сметалык документтер даярдалгандан кийин анын так баасы аныкталат.

Момбековдун айтымында, сунушталган келишим долбоорду ишке ашырууга укуктук негиз түзөт.
Барскоон - Бедель жолу Кыргызстан менен Кытайды байланыштырган жаңы транспорттук коридор катары курулууда. Долбоордо 50дөн ашык көпүрө, «Соок» жана «Ашуу-Суу» аттуу эки тоннель жана башка инженердик курулуштар каралган.

Негизги курулуш иштерин 2029-жылы аяктоо, жолду толук пайдаланууга берүүнү 2030-жылга пландоо каралган.

БАЙЛАНЫШТАР

СОЦИАЛДЫК ТАРМАКТАР

TelegramYouTubeWhatsAppFacebookInstagram

© АА «24.kg» - Кыргызстандын жаңылыктары. Бардык укуктар корголгон. Бул веб-сайтта жайгаштырылган бардык маалымат жеке пайдалануу үчүн гана арналган жана АА «24.kg» жазуу түрүндөгү уруксатысыз таратылышы мүмкүн эмес. Редакция кайра басылган материалдардын жана айрым адамдардын пикирлеринин мазмунуна жоопкерчилик тартпайт. +18