ЖК депутаты Баткен облусунда реабилитациялык борбор курууну сунуштады
Бүгүн, 9-сентябрда Жогорку Кеңештин жыйынында депутат Ырысбек Атаджанов Баткен облусунда реабилитациялык борбор куруу зарылдыгын билдирди.
Эл өкүлүнүн айтымында, аймактагы майыптыгы бар балдарды тарбиялап жаткан көптөгөн жарандар балдарын дарылатуу үчүн коңшу Өзбекстанга барууга аргасыз болууда.
«Алар балдарын Бишкекке же Ысык-Көлгө алып баруу алыс экенин айтышууда. Облуста реабилитациялык борбор куруу маселеси курч турат. Мындай борборлорду уюштурууга боло турган имараттар бар же жаңысын курса болот. Бирок майыптыгы бар балдарга сөзсүз жардам берүү керек», — деди Ырысбек Атаджанов.
Ошондой эле башка депутаттар дагы Бишкекке келип, борбор шаарда узак убакыт жашаганга көбүнүн шарты жетпей турганын белгилешип, өлкөнүн бардык аймактарында реабилитациялык борборлорду куруу маселесин көтөрүштү.