Чет өлкөгө жумушка орноштурууну убадалаган: Баткендиктер 900 миң сом алдатышты
Баткенде бир нече алдамчылыкка шектелип 43 жаштагы жаран кармалды. Бул тууралуу аймактык Ички иштер башкармалыгынын басма сөз кызматы билдирди.

Маалыматка ылайык, ал 2025—2026-жылдар аралыгында Европа мамлекеттерине жумушка орноштуруу убадасы менен бир нече адамдан ар кандай суммадагы акча алып, изин жашырып кеткен. Жабырлануучулар жалпы 900 миң сом чыгып тартышкан.
Аталган фактылар боюнча Кылмыш-жаза кодексинин 209-беренеси (Алдамчылык) менен кылмыш иштери козголгон. Шектүү убактылуу кармоочу жайга киргизилген. Учурда тергөө иштери уланууда.
Милиция кармалган адамдын аракеттеринен жабыркаган болушу мүмкүн болгон жарандарды Баткен шаардык ички иштер бөлүмүнө (03622) 50068, 102, +996774778688 телефон номурлары аркылуу кайрылууга чакырат.