Кырчында «Көчмөндөр ааламы: жандуу мурас» этно-шаарчасы салтанаттуу ачылды
Бүгүн, 2-сентябрда Дүйнөлүк көчмөндөр оюндарынын алкагында Кырчын жайлоосунда «Көчмөндөр ааламы: жандуу мурас» этно-шаарчасынын салтанаттуу ачылыш аземи өттү. Бул тууралуу Маданият, маалымат жана жаштар саясаты министрлиги билдирди.
Иш-чарага Кыргыз Республикасынын Министрлер Кабинетинин Төрагасы — Кыргыз Республикасынын Президентинин Администрациясынын Жетекчиси Адылбек Касымалиев катышты.
Иш-чарада сөз сүйлөгөн Министрлер Кабинетинин Төрагасы VI Дүйнөлүк көчмөндөр оюндарынын маанисине токтолуп, оюндардын негизги иш-чаралары Ысык-Көлдүн аймагындагы сегиз аянтчада өтүп жатканын белгиледи.
Ал ошондой эле Кырчын жайлоосунда түзүлгөн этно-шаарча көчмөн цивилизациясынын тарыхын, маданиятын, улуттук баалуулуктарын жана искусствосун бирдиктүү мейкиндикте чагылдырган өзгөчө маданий аянтча экенин белгиледи.
«Көчмөндөр ааламы: жандуу мурас» этно-шаарчасында кыргыз элинин салттуу маданияты, кол өнөрчүлүгү, улуттук кийимдери, каада-салттары, элдик оюндары, музыкасы жана күнүмдүк турмушун чагылдырган маданий объектилер жана боз үй комплекстери жайгаштырылган.
Министрлер Кабинетинин Төрагасы этно-шаарча ата-бабалардын мурасын сактоо, аны кеңири жайылтуу жана кийинки муундарга өткөрүп берүү үчүн маанилүү маданий аянтча болорун белгиледи.





