Татарстандын башчысы «Ала-Арча» жаратылыш паркында болду
Кыргызстанга VI Бүткүл дүйнөлүк көчмөндөр оюндарынын ачылыш аземине катышуу үчүн Татарстан Республикасынын башчысы Рустам Минниханов сапар менен келди.
Иш сапары алкагында Кыргызстандын Жаратылыш ресурстары, экология жана техникалык көзөмөл министерлиги тарабынан «Ала-Арча» жаратылыш паркына чыгуу уюштурулуп, анда ага өлкөбүздүн кайталангыс жаратылышы жана жаратылыш мурастары сунушталды.
КР Жаратылыш ресурстары, экология жана техникалык көзөмөл министри Акыл Токтобаев мейманга биологиялык ар түрдүүлүктү сактоо, жаратылыш экосистемаларын коргоо жана өзгөчө кайтарылуучу жаратылыш аймактарын өнүктүрүү боюнча жүргүзүлүп жаткан иштер тууралуу айтып берди.
Өлкөнүн жаратылыш мурасынын маанилүү бөлүгү болуп саналган Кыргыз Республикасынын тоо экосистемаларынын маанисине, ошондой эле сейрек кездешүүчү жана жоголуп кетүү коркунучунда турган жаныбарлардын түрлөрүн сактоо маселелерине өзгөчө көңүл бурулду.
Бул сапарды уюштуруу меймандарга неформалдуу шартта Кыргызстандын жаратылыш байлыгын көрсөтүүгө жана курчап турган чөйрөнү коргоо менен биологиялык ар түрдүүлүктү сактоо тармагында кызматташтыкты андан ары өнүктүрүүнүн маанилүүлүгүн белгилөөгө мүмкүнчүлүк болду.

