Ош шаарында курулуштагы эреже бузуулар үчүн компанияга 200 миң сом айып салынды
Ош шаарында Мамыров көчөсү, 54 дарегинде 12 кабаттуу турак үй куруп жаткан «Найман Ийгилик» компаниясына 200 миң сом айып пул салынды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Текшерүү учурунда адистер болочок үй үчүн казылган котлован курулуш аянтынын тосмосунан чыгып кеткенин аныкташкан. Буга байланыштуу өткүнчүлөр жана объекттин жанында жүргөн башка адамдар үчүн коркунуч жаралган.
Компанияга эреже бузууну четтетүү жана коопсуздук талаптарын сактоо боюнча эскертүү берилди. Ошондон кийин тосмо чыңдалып, аныкталган кемчиликтер четтетилди.