Бишкекте жол кырсыгынан кийин тез жардам унаасы оодарылып кетти
Бишкекте жеңил унаа менен жеке тез жардам унаасынын катышуусунда жол кырсыгы катталды.
Күбөлөрдүн айтымында, авария Ахунбаев жана Тыналиев көчөлөрүнүн кесилишинде болгон. Сүзүшүүнүн кесепетинен «Веданта» клиникасынын тез жардам унаасы капталына оодарылып кеткен.

«103» кызматынан билдиришкендей, жеке тез жардамдын бригадасы жабыркаган эмес. Окуя болгон жерге «103» кызматынын бригадасы жиберилип, жеке тез жардам унаасында бара жаткан бейтапты алып кетип, ооруканага жайгаштырган.
Жол кырсыгынын башка чоо-жайы такталууда.