Пайдалуу кеңеш: Тиш тазалоодо көпчүлүк адамдар кайсы каталарды кетирет?
Табигый кылдан жасалган тиш щеткасы, аны кутучада сактоо, «бүт үй-бүлө үчүн» деп жазылган паста — сизге тааныш угулуп жатабы? Тилекке каршы, булар стоматологдун кабыл алуусуна барууну жакындаткан эң классикалык каталар болуп саналат. Бул тууралуу aif.ru сайтына медицина илимдеринин кандидаты, Пирогов атындагы университеттин Медициналык алдын алуу институтунун гигиена кафедрасынын доценти Екатерина Дубровина айтып берди.
1. Тиш щеткасын тандоо
Щетканы сейрек алмаштыруу: Аны ар бир 2-3 ай сайын, ал эми сасык тумоо же суук тийип ооруп айыккандан кийин дароо алмаштыруу зарыл. Болбосо кылдарында бактериялар чогулуп калат.
Табигый кылдуу щеткаларды сатып алуу: Алар экологиялык жактан таза көрүнгөнү менен, ичинде микробдор синтетикалык кылдарга караганда бир топ активдүү көбөйөт.
Щетканы туура эмес сактоо: Аны кутучага (футлярда) сактоо же кылын төмөн каратып коюу — бактериялардын өсүшү үчүн эң сонун шарт түзөт. Щетка жакшы кургашы үчүн аны ачык жерде, кылын өйдө каратып сактоо керек.
2. Ооз көңдөйүн күтүү
Тиш арасындагы боштуктарды унутуу: Щетка жетүүгө кыйын болгон жерлерге тие албайт. Тиш жиби — флосс же ирригатор колдонбосо, ал жерлерде кебер (налёт) чогулуп, кариеске жана бүйлө ооруларына алып келет.
Пастаны туш келди тандоо: Көйгөйүңүзгө жараша тандоо маанилүү. Фтордуу пасталар — кариеске каршы, фторсуз пасталар — эмалда тактар болсо (флюороз), ал эми атайын пасталар — сезгич тиштер же канаган бүйлөлөр үчүн колдонулат.
Тишти өтө тез же иретсиз тазалоо: Тишти эртең менен жана кечинде, эң аз дегенде 2-3 мүнөт тазалоо керек.
3. Стоматологго баруу
Тиш ооруганда гана баруу: Эч нерсе тынчсыздандырбаса дагы, жылына бир жолу пландалган текшерүүдөн өтүп туруу зарыл. Ошондо көйгөйлөрдү алгачкы баскычында аныктоого болот.
Профессионалдык тазалоону өткөрүп жиберүү: Үйдө канчалык жакшы кам көрсөңүз дагы, тиште баары бир кебер чогулуп калат. Жылына бир жолу аны стоматолог-гигиенисттен тазалатып туруу керек.