Ош шаарында улуттук ордо оюну үчүн жаңы аянтча ачылды. Бул тууралуу мэриянын басма сөз кызматы билдирди.
Аянтча борбордо, шаардык аянтта жайгашкан жана каалоочулардын бардыгы үчүн жеткиликтүү.

Спорттук объект шаардык дене тарбия жана спорт комитетинин балансына өткөрүлүп берилди. Бул жерде машыгуулар жана VI Дүйнөлүк көчмөндөр оюндарына тандоо мелдештери да өткөрүлөт.
Ордо — көчмөн ата-бабалардын аскердик тактикасын жана стратегиясын чагылдырган салттуу командалык оюн. Түз аянтчада тегерек сызылат (адатта диаметри 12-16 метр). Борбордогу чакан чуңкурга атайын пластинкадан (мүйүздөн, сөөктөн же металлдан) жасалган «хан» жайгаштырылат. «Хандын» айланасына аскерлерди символдоштурган чүкөлөр — «аскерлер» тизилет. Командалардын максаты — атайын бита («абалак») менен таамай сокку уруп, «аскерлерди» жана «ханды» тегеректен чыгаруу болуп саналат.