Кыргызстандын Екатеринбургдагы башкы консулу кызматынан бошотулду
Максат Тентимишов Кыргызстандын Екатеринбургдагы башкы консулу кызматынан бошотулду. Бул тууралуу Тышкы иштер министрлигинин сайтында маалымдалат.

«Кабыл алынган чечимге ылайык, Тентимишов Максат Ишенбекович Кыргыз Республикасынын Екатеринбург шаарындагы Башкы консулу кызматынан бошотулду», — деп айтылат маалыматта.
Муну менен бирге, анын кызматтан кетүү себеби жана чечим ким тарабынан кабыл алынганы айтылган эмес.
Эске салсак, Максат Тентимишов КРнын башкы консулу постуна 2024-жылдын 3-июнунда президенттин жарлыгы менен дайындалган. Документте ал Пермь крайы, Россия Федерациясынын Свердлов, Челябинск, Курган жана Тюмень облустарынын аймактарын камтыган консулдук округу менен Кыргыз Республикасынын Екатеринбург шаарындагы Башкы консулу болуп дайындалганы белгиленген.