2026-жылдын январь — май айларынын жыйынтыгы боюнча, алдын ала баалоо боюнча ички дүң өнүмдүн (ИДП) көлөмү 781 миллиард 61,4 миллион сомду түздү. Бул көрсөткүч 2025-жылдын январь — май айларына салыштырмалуу 12,2 пайызга өскөнүн Улуттук статистика комитети билдирди.
ИДПнын өсүү темпи бир ай ичинде бир аз басаңдады — 2026-жылдын апрель айынын жыйынтыгы боюнча ал 12,4 пайызды түзгөн болчу.
ИДПнын жалпы көлөмүндө тейлөө чөйрөсүнүн үлүшү 51,1 пайыздан ашыкты, товар өндүрүү тармактары — 32,6 пайызды жана продукцияга салынган таза салыктар — 16,3 пайызды түздү.
Өнөр жайда кайсы тармактар алдыда баратат
2025-жылдын январь — май айларына салыштырмалуу өнөр жайдын 14,4 пайызга өсүшүн камсыз кылган негизги тармактар төмөнкүлөр болду:
- химиялык продукцияларды өндүрүү — 3 эсеге;
- фармацевтикалык продукцияларды өндүрүү — 1,8 эсеге;
- жыгач жана кагаз буюмдарын өндүрүү, полиграфиялык ишмердүүлүктүн продукциялары — 1,7 эсеге;
- унаа каражаттарын өндүрүү — 1,6 эсеге.
Бир ай ичинде алдыңкы үчтүк өзгөргөн жок. Беш айдын ичинде өнөр жай өндүрүшүнүн жалпы көлөмү 374 миллиард 656,1 миллион сомду түздү.
Баалар кандай өзгөрүүдө
Январь — май айларында керектөө бааларынын жана тарифтердин өсүшү (2025-жылдын декабрына салыштырмалуу) 4,8 пайызды түздү. Жылдык эсепте инфляция тездешин улантып, 11 пайызга жетти.
2026-жылдын башынан бери бардык негизги позициялар боюнча баалардын өсүшү катталды. Алсак, төмөнкүлөр кымбаттады:
- калкка көрсөтүлүүчү кызматтардын тарифтери — 7,1 пайызга;
- алкоголдук ичимдиктер жана тамеки азыктары — 6,5 пайызга;
- тамак-аш азыктары жана алкоголсуз ичимдиктер — 4,8 пайызга;
- азык-түлүк эмес товарлар — 2,8 пайызга.