USD87.45EUR95.88RUB1.07
24.kg

Дүйнө чемпионаты: Кыргыз тайгандары Италияда алтын медаль утту

12:29, 12 июня 2026, Бишкек - 24.kg

Кыргыздын улуттук тайган тукумундагы иттери Дүйнөлүк кинологиялык федерациянын (FCI) астында Италиянын Болонья шаарында өткөн бардык тукумдагы иттердин Дүйнөлүк чемпионатында чоң ийгиликке жетишти.

Эл аралык форумда Кыргызстандын атынан «Фаворит-Алатоо» питомнигинин тайгандары катышты. Бул тукум боюнча дүйнө чемпионаты 6-июнда өттү. Мелдешке Аргентинадан келген FCI эксперти Мигель Анхель Мартинес калыстык кылды.

Кыргызстандык эки ит тең жогорку баага татып, өз класстарында жеңүүчү болушту. «Фаворит-Алатоодон» Бермет аттуу тайган чемпиондор классында жеңишке жетсе, Фаворит-Алатоо Ай Пери интермедиа классында эң мыкты деп табылды.

Тукумдун эң мыкты өкүлүн аныктоочу акыркы сыноонун жыйынтыгында Бермет 2026-жылдын Дүйнө чемпиону наамын багындырды жана ошол эле учурда Италиянын чемпиону болду. Иттин биргелешкен ээси — москвалык Андреана Блинова. Кыргызстандын дагы бир өкүлү — Фаворит-Алатоо Ай Пери дүйнөнүн вице-чемпиону аталды.

Бул кыргыз тайгандарынын дүйнөлүк деңгээлдеги биринчи ийгилиги эмес. 2023-жылы Ай Пери  аттуу тайган Женевада (Швейцария) өткөн көргөзмөдө дүйнө чемпиону болуп, Швейцариянын чемпиону наамын жана Женеванын Гран-присин утуп алган. Бүгүнкү күндө ал дүйнөдөгү эң көп титулга ээ тайгандардын бири болуп саналат.

«Фаворит-Алатоо» питомнигинин ээси жана багуучусу Эсенгельды Мукеев учурда питомник тайгандар арасында эки дүйнө чемпиону жана бир дүйнөнүн вице-чемпиону титулуна ээ экенин белгиледи.

БАЙЛАНЫШТАР

СОЦИАЛДЫК ТАРМАКТАР

TelegramYouTubeWhatsAppFacebookInstagram

© АА «24.kg» - Кыргызстандын жаңылыктары. Бардык укуктар корголгон. Бул веб-сайтта жайгаштырылган бардык маалымат жеке пайдалануу үчүн гана арналган жана АА «24.kg» жазуу түрүндөгү уруксатысыз таратылышы мүмкүн эмес. Редакция кайра басылган материалдардын жана айрым адамдардын пикирлеринин мазмунуна жоопкерчилик тартпайт. +18