Баткен облусунда милиция ири өлчөмдөгү баңгизат ташуу жолуна бөгөт койду
Баткен облусунда ири өлчөмдөгү баңги каражаттарын мыйзамсыз ташуу фактысына бөгөт коюлду. Бул тууралуу Ички иштер министрлигинин басма сөз кызматы билдирди.
Маалыматка ылайык, Тажикстандан Баткен облусу аркылуу Өзбекстанга ири өлчөмдөгү баңгизаттарды мыйзамсыз ташып жүргөн уюшкан топтун ишмердүүлүгү тууралуу маалымат келип түшкөн.
КР Кылмыш-жаза кодексинин 282-беренеси боюнча козголгон кылмыш ишинин алкагында Кадамжай районунда Hyundai Sonata үлгүсүндөгү унаанын айдоочусу кармалган. Тинтүү учурунда унаанын ичинен өзгөчө жыты бар зат салынган 10 таңгак табылган. Соттук-химиялык экспертиза алынган зат баңги каражаты — гашиш экенин тастыктады. Баңгизаттын жалпы салмагы 9 килограмм 908 граммды түздү.

Кармалган жаран Баткен районунун тургуну, 1987-жылы туулган А.С. аттуу жаран болуп чыкты. Учурда тергөө амалдары жүрүп жатат.