USD87.45EUR95.88RUB1.07
24.kg

Бишкектеги эл аралык көргөзмөгө алты өлкөдөн 90дон ашык компания катышууда

16:04, 04 июня 2026, Бишкек - 24.kg

Ala-Too Trade & Industry Expo

Министрлер кабинетинин төрагасы Адылбек Касымалиев Бишкек шаарында өтүп жаткан «Ala-Too Trade & Industry Expo» биринчи эл аралык соода-өнөр жай көргөзмөсүнө барды.

Министрлер кабинетинин басма сөз кызматынын маалыматы боюнча, көргөзмөгө алты өлкөдөн 90дон ашык компания катышууда.

Аянтчада өнөр жай ишканаларынын продукциялары, инновациялык иштеп чыгуулар, инвестициялык долбоорлор, ошондой эле катышуучу мамлекеттердин улуттук павильондору көрсөтүлгөн.

Экспозицияны көрүү учурунда Адылбек Касымалиев ата мекендик өндүрүүчүлөрдү колдоонун, заманбап технологияларды киргизүүнүн жана өлкөнүн экономикалык өсүшүнүн негизги факторлорунун бири болгон өнөр жай секторун өнүктүрүүнүн маанилүүлүгүн белгиледи.

«Ala-Too Trade & Industry Expo» — ШКУга мүчө мамлекеттердин жана өнөктөш өлкөлөрдүн өнөр жай ишканаларын, соода компанияларын, инвесторлорун жана мамлекеттик институттарын бириктирген эл аралык B2B жана B2G платформасы болуп саналат.

Көргөзмөнүн негизги максаты — соода-экономикалык байланыштарды чыңдоо, ишкердик кызматташтыкты кеңейтүү жана өндүрүүчүлөрдүн продукцияларын аймактык жана эл аралык рынокторго чыгаруу.

Кыргызстандын ШКУдагы төрагалыгы алдында өтүп жаткан бул көргөзмө 6-июнга чейин уланат.

БАЙЛАНЫШТАР

СОЦИАЛДЫК ТАРМАКТАР

TelegramYouTubeWhatsAppFacebookInstagram

© АА «24.kg» - Кыргызстандын жаңылыктары. Бардык укуктар корголгон. Бул веб-сайтта жайгаштырылган бардык маалымат жеке пайдалануу үчүн гана арналган жана АА «24.kg» жазуу түрүндөгү уруксатысыз таратылышы мүмкүн эмес. Редакция кайра басылган материалдардын жана айрым адамдардын пикирлеринин мазмунуна жоопкерчилик тартпайт. +18