USD87.45EUR96.10RUB1.06
24.kg

Бишкекте бильярд боюнча дүйнө чемпиону Каныбек Сагынбаев кармалды

10:34, 12 марта 2024, Бишкек - 24.kg

Ички иштер министрлиги ишенип берилген мүлктү ыйгарып алуу же коротуу фактысы менен спорт мектебинин директору кармалганын билдирди.

Маалыматка ылайык, Свердлов райондук ички иштер башкармалыгына Бишкек шаарынын мэриясынын дене тарбия жана спорт, туризм жана жаштар менен иштөө департаментинин директорунан кайрылуу келип түшкөн. Анда спорттук мектептердин биринде мүлктү кабыл алуу жана өткөрүп берүү учурунда спорттук инвентарлардын көлөмү инвентаризациялык отчетко туура келбеген фактылар аныкталганы билдирилген. Натыйжада мамлекеттик бюджетке 1 миллион сомдон ашык зыян келтирилген.

Аталган факты боюнча Кылмыш-жаза кодексинин 210-беренесинин (Ишенип берилген мүлктү ыйгарып алуу же коротуу) негизинде кылмыш иши козголгон.

Тергөө иштеринин жүрүшүндө 1985-жылы туулган С.К. аттуу жаран аталган мекеменин директору кызматына дайындалып жатканда жооптуу адамдарга Жусуп Баласагын атындагы Кыргыз улуттук университетинин алдындагы Башкаруу жана бизнес институтунун дипломун бергени аныкталган. Бирок алынган расмий маалыматтарга ылайык, жогоруда көрсөтүлгөн диплом С.К. наамына берилген эмес жана архивдик документтердин, окуу жайдын өздүк курамы боюнча буйруктардын арасында көрсөтүлгөн эмес.

Аталган факты боюнча «Документтерди жасалмалоо» беренеси боюнча өзүнчө кылмыш иши козголгон.

Тергөө жана ыкчам-издөө иш-чараларынын жүрүшүндө С.К. шектүү катары аныкталып, кармалган. Бишкек шаарынын Свердлов райондук соту аны үй камагына чыгарган.

Белгилей кетсек, шектүүнүн баш тамгалары бильярд боюнча дүйнөнүн үч жолку чемпиону Каныбек Сагынбаевдин аты-жөнүнө туура келет.

БАЙЛАНЫШТАР

СОЦИАЛДЫК ТАРМАКТАР

TelegramYouTubeWhatsAppFacebookInstagram

© АА «24.kg» - Кыргызстандын жаңылыктары. Бардык укуктар корголгон. Бул веб-сайтта жайгаштырылган бардык маалымат жеке пайдалануу үчүн гана арналган жана АА «24.kg» жазуу түрүндөгү уруксатысыз таратылышы мүмкүн эмес. Редакция кайра басылган материалдардын жана айрым адамдардын пикирлеринин мазмунуна жоопкерчилик тартпайт. +18