USD87.45EUR95.90RUB1.07
24.kg

Ооганстандагы кырдаал Ташкентте «С5+1» форматында талкууланды

15:21, 15 июля 2021, Бишкек - 24.kg

2021-жылдын 15-июлунда Кыргыз Республикасынын делегациясы Ташкент шаарында өткөн «С5+1» форматындагы (Казакстан, Кыргызстан, Тажикстан, Түркмөнстан, Өзбекстан жана АКШ) кезектеги жолугушууга катышты. Бул тууралуу Кыргызстандын Тышкы иштер министрлиги билдирет.

Жолугушууда Афганистандын аймагынан коалициялык аскерлердин чыгып кетишине байланыштуу бул өлкөнүн айланасындагы кырдаал талкууланды. Кыргыз тарабы Афганистандан келип чыккан чек ара коркунучтарына тынчсыздануусун билдирип, чыр-чатакты жөнгө салууда ар тараптуу жардам көрсөтүүгө даяр экендигин белгилеп, бул биринчи кезекте афган ичиндеги диалогго негизделиши керектигин билдирди.

Мындан тышкары, коронавирус пандемиясынын терс кесепеттерин жоюу темасы, анын ичинде вакциналарды мамлекеттер арасында бирдей бөлүштүрүү жана азык-түлүк коопсуздугу жаатында кызматташуу маселеси талкууланды.

Жолугушуунун катышуучулары Афганистандан келип чыккан коркунучтарга каршы туруу жана туруктуулукту бекемдөө каражаты катары экономика жана коопсуздук жаатында кызматташтыкты өнүктүрүүнү улантууга макулдашышты.

БАЙЛАНЫШТАР

СОЦИАЛДЫК ТАРМАКТАР

TelegramYouTubeWhatsAppFacebookInstagram

© АА «24.kg» - Кыргызстандын жаңылыктары. Бардык укуктар корголгон. Бул веб-сайтта жайгаштырылган бардык маалымат жеке пайдалануу үчүн гана арналган жана АА «24.kg» жазуу түрүндөгү уруксатысыз таратылышы мүмкүн эмес. Редакция кайра басылган материалдардын жана айрым адамдардын пикирлеринин мазмунуна жоопкерчилик тартпайт. +18