USD87.45EUR95.90RUB1.07
24.kg

«YouTube» өзбек тилдүү каналдардын авторлоруна акча төлөөнү токтотту

09:11, 25 мая 2021, Бишкек - 24.kg

«YouTube» компаниясы өзбек тилиндеги каналдардын авторлорун материалдык жактан колдоону токтотту.

Акыркы жылдары Өзбекстанда видеоблогинг тездик менен өнүгүп, анын аркасы менен акча тапкан авторлор көбөйгөн. Алардын арасында «YouTube» каналдарындагы көрүүлөр үчүн эле бир нече миң доллардан тапкандары да болгон.

Бирок апрелден тартып өзбекстандык блогерлердин «YouTube» видеохостингиндеги тасмалардан түшкөн кирешелери кескин азайып кеткен. Буга «YouTube» компаниясынын жетекчилиги өзбек тилдүү аудиторияга арналган каналдардын авторлорун материалдык жактан колдоону токтоткону себеп болгон.

Компания азырынча бул чектөөнүн эмнеге байланыштуу экенин түшүндүрө элек. Qalampir.uz басылмасынын маалыматына караганда, мындай чечим «Youtube» Өзбекстандын аймагында өз ишмердүүлүгүн жүргүзбөгөнү менен байланыштуу болушу мүмкүн.

«YouTube» компаниясы ишмердүүлүгүн расмий жүргүзбөгөн өлкөлөрдө блогерлер кошумча мүмкүнчүлүктөргө ээ болушат. Алар «YouTube Premium» кызматтарын, демөөрчүлүк модулдарды жана «YouTube.Music» платформасын пайдалана алышат. Бирок Өзбекстанда бул кызматтар эч качан жеткиликтүү болгон эмес. Эми өзбек блогерлери жарнамадан да киреше таба албай калышат.

2016-жылы «YouTube» сайты Өзбекстанда алты күнгө бөгөттөлгөн. Бирок анда өлкөдө видеоблогерлик азыркыдай популярдуу эмес болчу.

БАЙЛАНЫШТАР

СОЦИАЛДЫК ТАРМАКТАР

TelegramYouTubeWhatsAppFacebookInstagram

© АА «24.kg» - Кыргызстандын жаңылыктары. Бардык укуктар корголгон. Бул веб-сайтта жайгаштырылган бардык маалымат жеке пайдалануу үчүн гана арналган жана АА «24.kg» жазуу түрүндөгү уруксатысыз таратылышы мүмкүн эмес. Редакция кайра басылган материалдардын жана айрым адамдардын пикирлеринин мазмунуна жоопкерчилик тартпайт. +18