Түп районунда мурунку депутат Садыр Жапаровдун тарапташтары митингге чыгышты
15:50, 22 января 2020, Бишкек - 24.kg

Буга чейин саясатчыны колдоо акциясы Тоң районунда өткөн.
«Садыр Жапаровду колдоо штабы тарабынан уюштурулган митинг бүгүн Түптө өтүп жатат. Абдан көп киши келди. Акция Ысык-Көлдүн баардык райондорунда жана шаарларында уюштурулууда. Февралда Бишкекте Садыр Жапаровду бошотуу талабы менен ири акция өткөзөбүз», — деп 24.kg агенттигине жарандык активист Мелис Аспеков билдирди.
Кумтөр маселесине байланыштуу өкмөткө каршы чакырыктары менен чыгып жүргөн Садыр Жапаров 2013-жылы «Караколдо митинг уюштуруп, Ысык-Көлдүн ошол кездеги губернатору Эмилбек Каптагаевди барымтага алган» деген айыптын негизинде 2017-жылдын мартында камакка алынган. 2018-жылы июнь айында экс-депутат 11 жыл алты айга кесилген. Быйыл апрелде Жогорку сот анын жаза мөөнөтүн 1,5 жылга кыскартып, он жылын калтырган.