ЧКМ аба ырайы кескин өзгөрө тургандыгын эскертти

Кыргызстандын Чукул кырдаалдар министрлиги аба ырайы кайрадан кескин өзгөрө турганын эскертти. Бул туурасында ведомствонун маалымат кызматы кабарлайт.

Анын билдирүүсүндө, аба ырайы кескин өзгөрүп, 8-9-мартта тоолу аймактарга жааган жамгыр карга айланат. Тоо этектерине жана тоолуу аймактарга кар жаап, тоң жүрөт. О.э. суу кар зымдарга жана бак-дарактарга тоңуп, жолдор тайгак болуп, кар көчкү болорун эскертет.

9-10-мартта абадагы температура Чүй, Талас, Ыссык-Көл облустарында төмөндөйт, айрым райондордун дыйканчылык аймактарында түнкүсүн -10...-15, -20, күндүзү -3...-8ге чейин түшөт. 

Ош, Жалал-Абад жана Баткен облустарынын дыйканчылык аймактарында түнкүсүн -7...-12, күндүзү 0...-5, тоо этектеринде түнкүсүн -12...-17, күндүзү -4...-9гө чейин.

Нарын облусунун дыйканчылык аймактарында жана тоолордо түнкүсүн -20...-25, күндүзү -10...-15, бийик тоолуу аймактарында түнкүсүн -30...-35, күндүзү -15...-20га чейин.

ЧКМ мындай аба ырайынын шарты республика түштүгүндөгү айыл чарба иштерине тоскоолдук жаратып, талаадагы жайылган малга, о.э. автотранспорт, энергетика, коммуналдык кызмат тармактарына да кыйынчылык алып келерин эскертет.